Asociacioni i Gruas “Feminae” është një organizatë joqeveritare e themeluar në fillim të vitit 2017, me seli në Prizren. Kjo organizatë është themeluar me qëllim të fuqizimit të grave dhe vajzave nga të gjitha komunitetet që jetojnë në qytetin e Prizrenit dhe zonat përreth.

Që nga fillimi, qëllimi kryesor i organizatës ka qenë sensibilizimi dhe mobilizimi i grave për të promovuar të drejtat e tyre, fuqinë, potencialin dhe rolin thelbësor që ato luajnë në forcimin e familjes dhe zhvillimin e shoqërisë kosovare. Një ndër objektivat kryesore është edhe ruajtja dhe promovimi i trashëgimisë kulturore përmes angazhimit të grave si bartëse të vlerave tradicionale.

Sot, organizata numëron rreth 100 anëtare aktive nga komunitete të ndryshme dhe mbi 70 vullnetare, ku një pjesë e madhe janë studente dhe nxënëse të shkollave të mesme.

Simboli i organizatës është i përfaqësuar nga tri flutura, të cilat simbolizojnë botën femërore përmes:

• Harmonisë, mençurisë, dashurisë dhe transformimit;
• Metaforës së jetës shpirtërore që kalon nga lindja, jeta, martesa deri tek vdekja;
• Frymëzimit për jetë dhe forcës së ripërtëritjes;
• Lumturisë, bukurisë dhe energjisë pozitive të gruas, si forcë transformuese në shoqëri.

OJQ “Feminae” angazhohet vazhdimisht për t’u dalë në ndihmë grave dhe për të promovuar të arriturat e tyre në jetën shoqërore, ekonomike dhe kulturore.